Komuna e Skenderajt ka organizuar zbulimin e busteve të Sala dhe Hamit Jashari. Sot në Prekaz, në shënimin e 26-vjetorit të Epopesë së UÇK-së, u zbuluan bustet e heronjve Sala dhe Hamit Jashari, pikërisht në vendin ku ata sakrifikuan jetën e tyre për lirinë e Kosovës.
Në kuadër të shënimit të Epopesë, Komuna e Skenderajt ka bërë zbulimin e busteve të heronjve Sala e Hamit Jashari. Me këtë rast u vlerësua lart jeta dhe sakrifica që ata dhanë për lirinë e Kosovës.
Kryetari i Aleancës për Ardhmërinë e Kosovës, Ramush Haradinaj me bashkëpunëtorë ka marrë pjesë sot në zbulimin e busteve të heronjve Sala dhe Hamit Jashari në Prekaz.
“Në Prekazin heroik, çdo shtëpi ka një histori. Shembulli i qëndresës heroike të Baces Shaban, Ademit e Hamzës, nuk ishte i vetëm. Shtëpia e Hamit e Sale Jasharit ishte shndërruar në strehë të sigurt për celulat e para të Ushtrisë Çlirimtare të Kosovës. Luftëtarët e lirisë, gjetën aty ngrohtësinë, por edhe frymëzimin për të vazhduar në rrugën e lavdisë” ka thënë Haradinaj.Në kohën kur nëna Sale dhe baci Hamit, ishin bërë simbole të qëndrueshmërisë dhe gatishmërisë për sakrificë, ata hynë në faqet e historisë sonë kombëtare, për të mbetur aty, si yje ndriçues për brezat që vijnë”, ka thënë Haradinaj.
Pikërisht në vendin ku ata i falën jetën e tyre Atdheut, tha Haradinaj, “sot zbuluam bustet e tyre, që simbolizojnë sakrificën shekullore të familjeve shqiptare për liri e bashkim. Nëna Sale e baci Hamit, ju faleminderit për shërbimin!”.
