Mosfunksionimi i fabrikës së ujit në fshatin Talinoc të Muhaxherëve, po u sjellë probleme me ujin e pijshëm banorëve të gjashtë fshatrave të Ferizajt. Në Komunë thonë se fabrika është gati, por që ende nuk është bërë bartja te përgjegjësit për menaxhimin e ujit dhe se janë duke vazhduar punimet për shtrirjen e rrjetit.
Fabrika e ujit në fshatit Talinoc të Muhaxherëve ende nuk është vënë në funksion. Për këtë arsye, 6 fshatra të Ferizajt, Talinoci, Fshati i Vjetër, Bibaj, Sojeva, Dardania dhe Zllatari ende nuk kanë ujë nga ujësjellësi.
Në komunë thonë se fabrika është gati, por që ende nuk është bërë bartja te përgjegjësit për menaxhimin e ujit dhe se janë duke vazhduar punimet për shtrirjen e rrjetit.
“Sa i për ketë punëve të gjitha i ka pasur përsipër që ti përfundojë komuna dhe janë përfunduar sa i për ketë pjesë së menaxhimit është “Bifurkacioni” ajo që interesohet për ti marr këto aset në përdorim. I kemi bërë kërkesë disa herë që ti marrë në përdorim ende nuk kemi marr diçka zyrtare nga ata”, theksoi për RTK-në, Meriton Hajdini, drejtor i Infrastrukturës
Ndërsa në kompaninë “Bifurkacioni” e thonë të kundërtën, fajin ia lënë komunës.
“Për momentin nuk është funksionale sistemi i dezinfektimit nuk është funksional e dyta është që nuk kemi marrëveshje me komunën për pranim dhe dorëzim atë draft e kemi përgatitur e kemi dërguar komunës ende nuk e kanë kthyer jemi në pritje nuk e dimë sa kemi për të pritur”, tha Jeton Shabani, kryeshef ekzekutiv në KRU “Bifurkacioni”.
E në fshatin Dardani të Ferizajt kërkojnë që sa më parë të vihet në funksion furnizimi me ujë, pasi uji nga puset nuk është i përdorshëm për pije.
“Besojë që nëse jo këtë fillim vit së paku deri në fund të vitit të jemi me ujësjellës dhe të zgjidhet një problem i ka motshëm të banorëve të këtyre anëve dhe në fshatin tonë për arsye se këtu janë puset shumë të thella realisht shumica e banorëve detyrohen që ujin ta marrin nga qyteti ose nga vendbanimet e tjera ku ka ujë të pijshëm”, theksoi Fadil Halili, përfaqësues i fshatit Dardani.
Këto ditë janë duke u zhvilluar punimet për shtrirjen e gypit kryesor për furnizim me ujë edhe për këtë fshat.
