Shkëlqesia e Saj znj. Tamar Ziv, Ambasadore e Shtetit të Izraelit në Republikën e Kosovës, ka uruar të gjithë besimtarët myslimane në prag të fillimit të muajit të shenjtë të Ramazanit.
Postimi i saj në rrjetin shoqëror “X” është shoqëruar nga urimi i Shkëlqesisë së Tij z. Israel Katz, Ministër i Punëve të Jashtme të Shtetit të Izraelit, për Ramazanin.
“Urimet e mia më të ngrohta për të gjithë miqtë në Izrael, Kosovë dhe në mbarë botën në prag të fillimit të muajit të shenjtë të Ramazanit. Ramadan Kareem, Gëzuar Ramazanin!, Ramazan Sherif mubarek olsun!, Bahtalo Ramazano!”, ka shkruar ambasadorja Ziv në urimin e Saj.
Nga ana tjetër, në urimin e tij ministri Katz tha:
“Në prag të Ramazanit, dua t’u uroj të gjithë myslimanëve në Izrael dhe në mbarë botën dhe familjeve të tyre një muaj të mbarë dhe të bekuar, një muaj përmirësimi të vetvetes dhe i veprave të mira. Gjatë ngjarjeve të 7 tetorit, Izraeli u përball me terrorizmin vrasës, i cili nuk bëri dallim midis hebrenjve dhe arabëve. Gjatë gjithë kësaj kohe të vështirë, u shfaq fytyra e bukur e shoqërisë izraelite. Ne ishim dëshmitarë të bashkëpunimit në të gjithë sektorët, duke filluar me hebrenjtë, myslimanët, të krishterët dhe druzët, duke luftuar krah për krah, të dhurimeve të dyanshme të ushqimit dhe pajisjeve, të shqetësimit për të tjerët dhe përgjegjësisë së dyanshme. Këto vlera njerëzore janë të përbashkëta për të gjitha fetë. Të mos harrojmë familjet e pengjeve myslimane, të cilët do të shënojnë muajin e shenjtë të Ramazanit pa më të dashurit e tyre, pasi kanë kaluar më shumë se 150 ditë pa të dashurit e tyre, duke kaluar më shumë se 150 ditë në robërinë e Hamasit. Ne nuk do të pushojmë derisa të gjithë pengjet të kthehen në shtëpi. Botës e kuptoi, pa dyshim, se terrorizmi që na kërcënon mban emra të ndryshëm dhe është një kërcënim për të gjithë rajonin. Hamasi po përpiqet ta paraqesë luftën tonë si një luftë kundër myslimanëve. Kjo është një gënjeshtër. Shumë myslimanë shërbejnë në Forcën Mbrojtëse të Izraelit (IDF) dhe në policinë izraelite. Ushtria jonë është kundër atyre që vrasin fëmijë dhe përdorin Islamin në një mënyrë të shtrembëruar për të justifikuar barbarizmin e tyre. Dora e Izraelit është gjithmonë e shtrirë për paqe dhe fqinjësi të mirë me të gjithë shtetet fqinje dhe popujt e tyre. Paqja është përgjigja mbizotëruese ndaj të gjithë luftëtarëve të luftës dhe ajo hap rrugën e stabilitetit dhe mirëqenies, gjë të cilën e dëshiron i gjithë rajoni. Nga këtu, Muzeu për Art Islamik në Jerusalem, ju uroj agjërim të lehtë dhe gëzuar Ramazanin”. /Kosovatimes/
