Në mbledhjen e sotme të Qeverisë së Kosovës janë ndarë 520 mijë euro për financimin shtesë të projektit për renovim të kulmit dhe konstruksionit të hapësirës së brendshme në objektin e Institutit të Mjekësisë Ligjore (IML).
Ministri i Financave, Hekuran Murati, ka thënë se kjo kërkesë është bërë nga ministria e Drejtësisë, pas zjarrit dhe dëmeve që kanë ndodhur në atë objekt.
“Nga Ministria e Drejtësisë kemi pranuar kërkesë për ndarjen e mjeteve buxhetore në shumën prej 520 mijë eurove dhe kjo kërkesë ndërlidhet për renovimin e kulmit dhe rikonstruksionin e hapësirave në objektin e brendshëm të IML-së, pas zjarrit dhe dëmeve që kanë ndodhur në atë objekt”, ka thënë ai.
Tutje ai ka shtuar se mjetet do të merren nga shpenzimet e paparashikuara dhe do të transferohen në ministrinë e Drejtësisë.
“Mjetet nga kjo pikë merren nga shpenzimet e paparashikuara, kategoria e shpenzimeve kapitale dhe transferohen në Ministrinë e Drejtësisë, tek Instituti i Mjekësisë Ligjore”, ka shtuar Murati.
