Drejtori i Përgjithshëm i kompanisë amerikane “Tesla” , e cila prodhon automjete elektrike, Elon Musk është filmuar sot kur erdhi pa paralajmërim për të “mbështetur punonjësit” në fabrikën e grupit pranë Berlinit, një javë pas sabotimit që ndaloi prodhimin.
“Unë jam këtu për t’ju mbështetur,” u tha ai punonjësve të gjigafabrikës në jug të Berlinit, në qytetin e vogël të Greenheide.
Një javë më parë shpërtheu një zjarr në një shtyllë të linjës elektrike që ishte “pushtuar” nga një grup i vogël i ekstremit të majtë dhe një ndërprerje e energjisë e pengoi për disa ditë funksionimin e fabrikës së vetme “Tesla” në Evropë.
Musk i quajti zjarrvënësit “eko-terroristë”, duke pretenduar se prodhimi i automjeteve elektrike, në kundërshtim me pikëpamjet e tyre, kontribuon në mbrojtjen e planetit.
Vulkan Group, i cili mori përgjegjësinë për veprimin në linjën e transmetimit, njoftoi se ishte kundër zgjerimit të vendit të fabrikës Tesla të planifikuar për të dyfishuar kapacitetin e prodhimit në një milion automjete në vit.
Projekti, i refuzuar nga banorët në një referendum lokal në shkurt, është kritikuar veçanërisht për ndikimin e tij në disponueshmërinë e ujit dhe biodiversitetin, si dhe për shpyllëzimin e nevojshëm.
Prodhimi pranë Berlinit filloi në vitin 2022 pas një procesi të gjatë miratimi dhe ndërtimi me shumë pengesa ligjore dhe administrative.
“Grupi Vulcan”, i njohur për Shërbimin Informativ të Përgjithshëm Gjerman, ka marrë më parë përgjegjësinë për zjarrvënien në kantierin e ndërtimit të fabrikës “Tesla” në vitin 2021.
Sabotimi i javës së kaluar i shkaktoi “Tesla” një dëm që kompania e vlerësoi në disa qindra milionë euro./kosovatimes
