Në shkollën “Ismail Qemali”, në Mitrovicë, është rikthyer mësimi online ngase nxënësit po ndjehen të pasigurt nga kushtet e rënda brenda shkollës.
Ndonëse shkolla është përuruar vetëm katër vjet më parë, asaj i ka rënë çatia për 7 cm. Ajo që duhet theksuar është se në momentin e përurimit nuk ishte bërë ende pranimi teknik.
Në shkollën “Ismail Qemaili” në Mitrovicë, nxënësit nuk mund t’i vijojnë mësimet nga sot. Klasat janë të zbrazëta e shkas u bë infrastruktura e objektit e cila po i rrezikon.
Nga jashtë duket e kompletuar, por nga brenda objekti i kësaj shkolle është në gjendje të rëndë. Ka vetëm katër vite e gjysmë që është përuruar, por RTK ka mësuar se që nga ditët e para janë paraqitur probleme.
Kjo është gjendja e mureve në pothuajse çdo klasë por edhe në hapësirat e korridoreve.
Ujë rrjedh gjithandej edhe në afërsi të hapësirave ku ka kontakt me energjinë elektrike. Salla ku mbahen orët e edukatës fizike është mbushur me ujë nga çatia, e që është jofunksionale në ditët kur bie shi.
E nga jashtë çatia është në gjendje të rëndë, krejtësisht e pasigurt, ndërsa punëtorët e kësaj shkolle detyrohen të gjejnë mënyra për ta hequr ujin që mbetet aty.
“Problemet e shumta Infrastrukturore numëroren në objektin e kësaj shkolle që rrezikon jetën e 800 nxënësve, mirëpo problem më sfidues është çatia e cila ka rënë për 7 cm nën nivelin e duhur, sipas matjeve të KFOR-it.
Gjendja e objektit të shkollës ‘Ismail Qemali’, në Mitrovicë, po e rrezikon jetën e mbi 800 nxënëseve, prandaj procesi mësimor ka vazhduar online.
“KFOR-i ka ardhë të bëjë një intervenim në kulmin e prej fillimit në 2019-të kur kemi hy kur kanë fillua reshjet ka fillua me pikë veçanërisht në sallën e dukatës fizike dhe në atelienë këtu në hyrje, kur janë ardhë e kanë konstatua që është rrezik salla dhe hyrja, por i kanë parë edhe disa plasaritje që na kanë preferua mos të rrimë në objekt”, tha Mustafa Kajtazi, arsimtar i gjeografisë.
Ndryshe kjo shkollë nuk është pranuar teknikisht në kohën kur kanë mbaruar punimet dhe akoma është pa pranim teknik.
Ndërsa Drejtoria e Arsimit në Komunën e Mitrovicës ka njoftuar se kanë formuar një komision për verifikim e gjendjes faktike të objektit të shkollës ‘Isamil Qemaili’, derisa bëjnë të ditur se kjo drejtori e ka njoftuar MAShT-in për të kërkuar informata shtesë, sepse sipas tyre ky objekt është projektuar, financuar, ndërtuar dhe menaxhuar nga MAShTI.
