Zëvendësndihmës sekretari amerikan i Shtetit, Gabriel Escobar, gjatë vizitës së tij në Kosovë, takoi drejtorin e përgjithshëm të Policisë së Kosovës, kolonel Gazmend Hoxha dhe familjen e heroit rreshter Afrim Bunjaku.
Bëhet e ditur se gjatë vizitës së tij në Kosovë, Gabriel Escobar, është takuar me të venë dhe djemtë e rreshterit të vrarë Afrim Bunjaku, të cilët shoqëroheshin nga drejtori i Përgjithshëm i Policisë së Kosovës, Gazmend Hoxha.
“Escobar, në prani të Ambasadorit të ShBA-së Jeffrey Hovenier, dhe Atasheut të DOJ-ICITAP-it Kimberly Riffe, shprehu ngushëllimet e tij të sinqerta familjes për humbjen tragjike të babait/bashkëshortit të tyre. Ngjarja ishte shumë emocionuese dhe e përzemërt dhe personalitetet e larta i shprehën ngushëllimet e tyre familjes dhe Policisë së Kosovës”, thuhet në njoftimin Policisë së Kosovës.
Bëhet e ditur se në një takim të veçantë, Hoxha informoi Escobarin dhe atasheun Riffe për sulmin ndaj policisë në Banjskë më 24 shtator 2023, ku mbeti i vrarë rreshteri Bunjaku. Hoxha e njoftoi emisarin edhe me situatën aktuale të sigurisë në pjesën veriore të Kosovës. Escobar vlerësoi mundësinë për të komunikuar drejtpërdrejt më kreun e Policisë së Kosovës.
“DP Hoxha përcolli mirënjohjen e tij të thellë për Shtetet e Bashkuara dhe stafin e shumtë të ambasadës që ndihmojnë policinë dhe janë të përkushtuar për të vazhduar bashkëpunimin e tyre të shkëlqyer”, thuhet në njoftim. /Kosovatimes/
