Gjykata në Themelore në Prishtinë ka shpallur aktgjykimin kundër të akuzuarit M.A, për shkak të veprës penale “Marrje e ryshfetit’. I njëjti është shpallur fajtor dhe është dënuar me dy vjet burg si dhe është gjobitur me një mijë (1000) euro, të cilat duhet t’i mbajë dhe paguaj pas plotfuqishmërisë së aktgjykimit.
“Të pandehurit i shqiptohen edhe dënimet plotësuese, urdhri për kompensimin e humbjes apo dëmit ndaj të dëmtuarit B.H, dhe obligohet që t’i kompensojë dëmin e shkaktuar në shumën prej 2000 (dymijë) euro si dhe Ndalimi i ushtrimit të funksioneve në administratën publike ose në shërbimin publik, në kohëzgjatje prej tre (3) vite, pas përfundimit të dënimit me burgim”, thuhet në vendimin e Gjykatës.
I akuzuari M.A, po ashti detyrohet që të paguajë shpenzimet e procedurës penale si dhe paushallin gjyqësor në shumë prej 100 euro si dhe shumën prej nga 50 euro në emër të taksës për Fondin e Kompensimit të Viktimave të Krimit.
Kundër këtij aktgjykimi, sipas Gjykatës, palët kanë të drejtë ankese në Gjykatën e Apelit të Kosovës, përmes Gjykatës Themelore në Prishtinë. /Kosovatimes/
