Bandat e armatosura kanë sulmuar dy fshatra në Nigerinë veriperëndimore, duke rrëmbyer të paktën 100 njerëz nga shtëpitë e tyre, tha një banor lokal dhe një zyrtar i qeverisë për Associated Press.
Persona të armatosur sulmuan fshatrat në zonën e qeverisjes lokale Kajuru të shtetit Kaduna të shtunën dhe të dielën, tha anëtari i parlamentit Usman Dalami Stingo, i cili përfaqëson Kajuru.
Në shtetin Kaduna, më pak se dy javë më parë, pothuajse 300 nxënës të shkollës u rrëmbyen.
Rrëmbimi i fundit i madh, si ai i mëparshmi, iu fajësua grupeve banditësh të njohur për vrasjet masive dhe rrëmbimet në rajonet veriperëndimore dhe qendrore të Nigerisë.
Shumica e banditëve më parë ishin barinj, në konflikt me komunitetet lokale.
Rrëmbyesit sulmuan fshatin Dogon Noma herët në mëngjes të shtunën dhe rrëmbyen 14 gra, më pas sulmuan Kayuru-Station të dielën në mbrëmje dhe rrëmbyen 87 persona, tha Stingo.
“Nuk ka prani të forcave të sigurisë atje”, theksoi ai.
Ekziston një mungesë e dukshme e forcave të sigurisë në fshatrat e largëta nëpër Kaduna dhe arrestimet janë të rralla.
Të paktën tetë personat e rrëmbyer nga fshati Dogon Noma të shtunën janë të afërm të Madaki Tanko Aridu dhe sipas tij aty nuk ka prezencë ushtarake apo policore.
Ndërkohë, forcat e sigurisë nuk kanë dalë ende me vlerësime në lidhje me shpëtimin e 300 studentëve të rrëmbyer nga qyteti Kuriga në Kaduna.
Fëmijët besohet se mbahen peng në pyjet e mëdha që lidhin shumicën e shteteve në rajonin e trazuar.
Presidenti nigerian Bola Tinubu, i cili u zgjodh vitin e kaluar për të udhëhequr vendin afrikan me më shumë se 210 milionë banorë, ka përjashtuar mundësinë e pagesës së një shpërblimi – siç bëhet shpesh – për të liruar fëmijët.
Qeveria e Tinubu ende nuk ka komentuar mbi sulmet e fundit.
