Hajrizi, mes tjerash, ka folur për rolin historik të Konferencës së Rambujesë, që, siç tha ai, ishte një tagër tepër i lartë që ne duhej ta paguanim, duke përmendur gjenocidin e ushtruar nga forcat ushtarake e paramilitare serbe kundrejt popullit shqiptar.
”Ishte një tagër tepër i lartë që ne duhej ta paguanim për të ardhur NATO dhe për t’u çliruar Kosova”, tha Hajrizi.
Ai foli për formimin e grupeve në kuadër të delegacionit kosovar që kanë funksionuar mirë dhe pa vështirësi e me një konsensus të plotë u zgjodh edhe udhëheqësi dhe kryesia e delegacionit, si dhe grupin politik, që do të trajtonte gjithë dokumentet e Konferencës.
Hajrizi: Hollbruk e Hill më propozuan të formoja qeverinë e unitetit
Mehmet Hajrizi, pjesëmarrës i delegacionit të Kosovës në Konferencën e Rambujesë, ka folur për ecurinë e kësaj konference, që, sikundër e tha ai, nuk ka qenë e lehtë, sidomos faza e parë e konferencave ku përgatiteshin konferenca me karakter paqësor.
Ai, për delegacionin nga Kosova, tha se kishte vështirësi në formimin e një ekipi negociator gjithëpërfshirës.
“Paradoksalisht them se ne kishin vështirësi në formimin e një ekipi negociator gjithëpërfshirës që do të mund të fliste me kompetencë dhe të përçonte atje zërin e qytetarëve të Kosovës”, tha Hajrizi në “RTKPrime”.
Hajrizi, më tej, vuri në pah strukturën e ekipit të unitetit që përfaqësonte partitë politike të kohës, LDK-në, LBD-në, përfaqësuesit e UÇK-së dhe 2 përfaqësues të Shoqërisë Civile.
Ai, tutje, bëri të ditur nismën e formimit të një qeverie të unitetit, me propozimin e Hollbrukut dhe ambasadorit Hill.
“Unë kisha nja dy-tri kushte që të merrja përsipër themelimin e një qeverie të tillë, së pari të ndalej lufta, të instaloheshin trupat e NATO-s në Kosovë që të ruhej paqja dhe fillimin e një konference ndërkombëtare, ku do të bisedohej me palën serbe me ndërmjetësim ndërkombëtar”, tha Hajrizi.
Me këtë ide ishte dakorduar presidenti Rugova, por që vështirësi pati takimi me UÇK-në, ngase ishte kohë e ofensivave nga forcat serbe, të cilët na penguan të jetësonim atë takim.
Më tej, Hajrizi bëri të ditur mosunitetin e forcave politike e ushtarake ndërmjet tyre, deri pak kohë para organizimit të konferencës paqësore të njohur si Konferenca e Rambujesë.
