Ministri i Jashtëm serb, Ivica Daçiq, ka thënë të enjten se ruajtja e marrëdhënieve me Rusinë dhe Kinën është “interes jetik shtetëror” për Serbinë.
Daçiqi u takua me homologun e vet rus, Sergei Lavrov, të enjten në Moskë, ku e falënderoi Rusinë për qëndrimin dhe mbështetjen e vendosur për Serbisë në lidhje me integritetin territorial dhe sovranitetin e saj, si dhe për çështjen e Kosovës.
“Për ne është me rëndësi jetike ta dimë se kemi një zë të sigurt në Këshillin e Sigurimit,” tha Daçiq.
Beogradi zyrtar llogarit në mbështetjen e Rusisë dhe të Kinës në organizatat dhe institucionet ndërkombëtare për mosnjohjen e Kosovës si shtet të pavarur.
Serbia nuk e njeh pavarësinë e Kosovës – e shpallur nga Prishtina zyrtare më 2008 – por nga viti 2011 zhvillon dialog me të, nën ndërmjetësimin e Bashkimit Evropian, për normalizimin e marrëdhënieve fqinjësore.
Ministri i Jashtëm rus Lavrov tha para takimit se Rusia është e interesuar të “parandalojë krizat e reja” në Ballkan, sipas agjencisë së lajmeve, Beta.
Lavrovi thuhet t’i ketë thënë Daçiqit se dëshiron të dëgjojë prej tij një vlerësim për situatën në Ballkan, të cilën e ka vlerësuar si “serioze”.
Lavrov gjithashtu tha se Rusia i vlerëson marrëdhëniet me Serbinë dhe është e kënaqur me mënyrën se si po realizohen projektet e përbashkëta, raportoi Beta.
“Toni i këtyre marrëdhënieve është vendosur nga kontaktet e rregullta të presidentëve tanë [Vladimir] Putin dhe [Aleksandar] Vuçiq. Jemi të kënaqur me mënyrën se si po zbatohen marrëveshjet në sferën materiale, tregtinë, investimet, shkëmbimet humanitare, si dhe në fushën e bashkëpunimi sportiv”, tha Lavrov, sipas një njoftimi të Ministrisë së Punëve të Jashtme të Rusisë.
Daçiqi udhëtoi drejt kryeqytetit rus me ftesë të Lavrovit për ta shikuar një ndeshje miqësore në futboll mes ekipeve kombëtare të Serbisë dhe Rusisë të enjten pasdite.
Serbia do të bëhet kombëtarja e parë evropiane që luan ndeshje futbolli në Rusi prej se Moska e nisi pushtimin e Ukrainës në shkurt 2022.
Federata Evropiane e Futbollit (UEFA) njoftoi më 20 mars se kishte miratuar një ndeshje miqësore ndërmjet ekipeve kombëtare të Rusisë dhe Serbisë, si dhe një ndeshje ndërmjet klubit nga Beogradi, Crvena Zvezda, dhe Zenitit nga Shën Petersburgu.
“UEFA mund të konfirmojë se ka miratuar këto dy ndeshje miqësore”, tha UEFA në një përgjigje për Radion Evropa e Lirë (REL).
UEFA shtoi se autorizimi është “në natyrë administrative”.
“Ne duam të ritheksojmë se ndeshjet miqësore nuk janë pjesë e garave të UEFA-s dhe si të tilla nuk janë nën juridiksionin dhe përgjegjësinë e UEFA-s. Prandaj, pjesëmarrja e mundshme e ekipeve ruse në ndeshje të tilla miqësore nuk bie ndesh me vendimin e Komitetit Ekzekutiv për pezullimin e ekipeve ruse nga garat e UEFA-s”, shtoi ajo.
Beta raportoi se para takimit me Daçiqin, Lavrovi tha se “është e papranueshme politizimi i sportit, edhe pse Perëndimi me mbështetjen e zyrtarëve ndërkombëtarë vazhdon me një politikë të tillë dhe nuk duket se do të heqë dorë nga ajo së shpejti”.
Derisa kombëtaret e tjera evropiane, si Anglia apo Polonia, e shpërfillin ekipin kombëtar rus, kombëtarja e Serbisë ndjek politikën shtetërore.
Beogradi zyrtar nuk ka pranuar të bëhet pjesë e sanksioneve të Bashkimit Evropian – megjithëse synon të anëtarësohet në të – prej kur blloku filloi ta sanksionojë Rusinë dy vjet më parë, për shkak të pushtimit të Ukrainës.
Daçiq, shefi aktual i diplomacisë në Serbi, e mbron publikisht qëndrimin se Serbia nuk vendos sanksione ndaj Rusisë, megjithëse i kërkohet nga Bashkimi Evropian.
