Kryetari i Partisë Demokratike të Kosovë, Memli Krasniqi, në 25 vjetorin e intervenimit të NATO-s në Kosovë, ka thënë se bombardimet e NATO-s ndalën gjenocidin serb në Kosovë dhe i hapën rrugë fitores tonë përfundimtare, bashkë me burrat dhe gratë e UÇK-së.
Ai, në rrjetin social ‘Facebook’ ka shkruar se intervenimi i NATO-s ndali gjenocidin serb në Kosovë dhe i hapi rrugë fitores tonë përfundimtare, bashkë me burrat dhe gratë e UÇK-së, në realizimin e përpjekjeve të gjata të popullit tonë për liri dhe pavarësi.
“Sot shënojmë 25 vjetorin e intervenimit të NATO-s në Kosovë, një moment ky historik për popullin tonë. Nga 24 marsi i vitit 1999, për 78 ditë me radhë, bombardimet e NATO-s ndalën gjenocidin serb në Kosovë dhe i hapën rrugë fitores tonë përfundimtare, bashkë me burrat dhe gratë e UÇK-së, në realizimin e përpjekjeve të gjata të popullit tonë për liri dhe pavarësi”, ka shkruar Krasniqi.
Ai më tej shtoi se krahas përparimit të vendit dhe sfidat nëpër të cilat vendi ynë ka kaluar, duhet rikujtuar miqtë tanë të shtrenjtë që ishin aty për ne në orët tona më të errëta.
“Prandaj, mirënjohja për forcat e NATO-së, të prira nga SHBA-të, është e përhershme dhe e paharruar. Sot, Kosova qëndron si një testament i fuqisë së unitetit, guximit dhe qëndrueshmërisë së botës demokratike”, ka shkruar Krasniqi, teksa shprehu keqardhje që ky jubile kaq i rëndësishëm, që ka përcaktuar të ardhmen e shtetit dhe popullit tonë, e gjen Kosovën pa një manifestim zyrtar institucional.
“Një tjetër veprim i gabuar i këtij pushteti, që shpërfaq mendësinë shpërfillëse dhe mosmirënjohëse ndaj aleatëve tanë të përhershëm”, vë në dukje Krasniqi.
“Megjithatë, nga zemra, duke uruar që shumë shpejtë të jemi edhe ne pjesë e saj, për aleancën e NATO-s kemi vetëm një fjalë: Faleminderit!”, ka shkruar në fund, Krasniqi. /Kosovatimes/
