Sot në prani të familjarëve, shokëve, miqve dhe dashamirëve, në Prapashticë, u shënua përvjetori i rënies së Heroit të Kombit, Ismet Asllani, i cili u vra më 24 Mars 1999, në Lipjan.
Ndër të pranishmit ishte edhe komandanti Adem Shehu, ushtarak i njohur i Republikës së Shqipërisë i cili gjatë luftës iu bashkua UÇK-së.
Asllani ishte njëri prej organizatorëve të logjistikës së Ushtrisë Çlirimtare të Kosovës, në Zonën e Llapit. Ai shquhej për humanizmin, përkushtimin dhe sakrificat e tij për liri dhe pavarësi.
Rënia e tij në luftën për çlirimin e Kosovës do të mbetet gjithmonë në kujtesë, si simbol i përpjekjeve dhe guximit të jashtëzakonshëm.
Homazhe për Asllani u bënë edhe pranë pllakës përkujtimore të Heroit të Kombit, në Lipjan. Me këtë rast kryetari i Komunës, Imri Ahmeti, tha se idealet e Ismetit e të shokëve të tij për një shtet të prosperuar e zhvilluar, janë detyrim dhe inspirim i përhershëm i gjithë neve.
