Kryetari i Kuvendit të Kosovës, Glauk Konjufca, ka përkujtuar masakrën e Rrezallës në Skenderaj në përvjetorin e 25-të të saj, duke thënë se heronjtë nuk do të harrohen kurrë, sepse sipas tij do të frymojnë me lirinë.
“Rrezalla nuk ishte episod i izoluar apo rast përjashtimor, por ndodhi në vazhdën e fushatës së krimeve kundër njerëzimit, gjenocidit, masakrave të njëpasnjëshme dhe spastrimit etnik, që ishin mekanizma dhe mjete të shtetit të Serbisë, si strukturë e kalkulimit dhe gjenerimit të vrasjes në masë”, ka shkruar ai.
Konjufca teksa ka përkujtuar masakrimin e 98 civilëve dhe zhdukjen me dhunë të 44 trupave, ka thënë se Serbisë nuk i ka ndërruar mendësia.
“Serbisë i kanë ndryshuar rrethanat, por jo mendësia. Pa e ndryshuar mendësinë dhe pa u përballur me krimet e veta, përballë nesh ajo do të përbëjë gjithnjë shtetin e zhytur në krimin e përbindshëm dhe kërcënim të vazhdueshëm. Ne kemi dëshmorë e martirë të cilëve u përkulemi, ndërsa Serbia kriminelë lufte që i mbron”, ka shkruar ai në facebook. /Kosovatimes/
