Skuadra e Bayern Munichut u dha një tjetër tronditje tifozëve të vet, pasi pësoi humbje nga Heidenheim, me rezultat 3:2, në xhiron e 28-të të Bundesligës. Bavarezët kishin dy gola epërsi në pushim, por pësuan tre gola në pjesën e dytë, duke ia bërë edhe më të lehtë rrugën drejt titullit të kampionit, Bayer Leverkusenit.
Harry Kane dhe Serge Gnabry shënuan për Bayernin në pjesën e parë, por më pas vendësit arritën të bëjnë një kthesë të jashtëzakonshme, me një gol të Sessa dhe dy të tjerë nga Kleindenst.
Kësisoj, djelmoshat e Thomas Tuchel heqin dorë përfundimisht nga gara për titull, i cili me gjasë do t’i takojë Bayer Leverkusenit për herë të parë në histori.
“Farmacistët” e Xabi Alonsos festuan me rezultat minimal 1:0 te Union Berlin dhe tashmë kanë 16 pikë epërsi ndaj konkurrentit të vetëm për fronin. Shënues i golit të fitores ishte Florian Wirtz, i cili shënoi me saktësi një penallti në sekondat e fundit të pjesës së parë.
Në ndeshjet e tjera të ditës së sotme, RB Leipzig fitoi bindshëm 1:4 si mysafir ndaj Freiburgut , Mainz shënoi fitore të rëndësishme në garën për mbijetesë dhe mundi Darmstadt, me rezultat bindës 4:0, ndërsa Bochum edhe pse ishte në epërsi 1:0 si mysafir ndaj Këlnit, në fund nikoqirët arritën të bënin një kthesë të madhe në dy minutat e fundit dhe festuan me rezultat 2:1.
