Sot bëhen 25 vjet nga rënia e luftëtarit, heroit dhe artistit Agim Ramadani, i cili gjatë luftës u dëshmua si strateg i lartë.
Agim Ramadani u lind në Zhegër të Gjilanit, më 3 maj 1963. Shkollimin fillor e kreu në vendlindje, të mesmen në Gjilan në vitin 1980, ndërsa Akademinë ushtarake në drejtimin e komunikacionit në Zagreb të Kroacisë.
Teksa la familjen e tij në Zvicër ku jetoi për disa vjet, Agim Ramadani në vitin 1998 iu bashkua Ushtrisë Çlirimtare të Kosovës.
Përtej pjesës atdhetare, ai njihet edhe si artist i rrallë. Ramadani ka qenë poet dhe piktor, me të cilat është marrë që nga shkolla e mesme. Poezitë e tij kanë qenë të botuara në dhjetëra revista, ndërkaq ka hapur ekspotita kolektiev e personale në Kroaci, ku punoi si ushtarak e në Zvicër, ku jetoi si emigrant politik.
Ramadani të cilën në luftë e quajtën ‘Katana’, ishte njëri ndër hartuesit e planit për thyerjen e kufirit shqiptaro-shqiptar dhe ishte i pari që shkuli gurin-piramidën-kufitare në Koshare. Pas thyerjes së kufirit, në pjesën e Kosovës, te vendi i quajtur Rrasa e Zogut, ai ra heroikisht.
Në Gjilan para Teatrit Kombëtar i është ngritur një shtatore, në të cilën janë komponuar të gjitha elementet artistike dhe luftarake të Agim Ramadanit – Katanës. Është përfaqësuar në disa leksikone dhe antologji të shkrimtarëve shqiptarë, të botuara pas vitit 2000.
