Bayer Leverkuseni ka fituar ndeshjen e parë çerekfinale të Ligës së Evropës ndaj West Ham me rezultat 2-0, për të bërë hap të madh për kalimin tutje.
Golat e fitores u shënuan krejt në fund edhe pse “Aspirinat; kishin dominim dhe raste nga fillimi deri në fund.
Jonas Hoffman zhbllokoi ndeshjen në minutën e 83-të për t’i dhënë epërsinë Bayerit.
Vulën takimit ia dha Victor Boniface që shënoi në minutën e parë të kohës shtesë.
Granit Xhaka, udhëhoqi mesfushën e Leverkusenit edhe në këtë ballafaqim, duke e kompletuar ndeshjen për 90 minuta.
Bayer Leverkuseni është afër që ta fitojë titullin e parë në Bundesligë dhe Kupën e Gjermanisë për herën e dytë në histori, ndërsa ka bilance prej 42 ndeshje rresht pa humbje, prej tyre 37-të fitore.
