Policia e Kosovës ka reaguar lidhur me rastet e fundit të vrasjeve të dy grave nga burrat.
Përmes një komunikate për media, Policia e Kosovës ka bërë të ditur se në dy rastet e fundit të vrasjes së grave, policia ka marrë veprime konkrete dhe ka arrestuar të dyshuarit duke i dërguar para organeve të drejtësisë.
Madje nga Policia e Kosovës potencojnë se rastet e dhunës në familje kanë shënuar rënie prej 10.77% në krahasim me vitin e kaluar.
“Rastet e dhunës në familje kanë qenë dhe vazhdojnë të mbeten shqetësuese, edhe përkundër faktit se rastet e tilla në vitin e fundit kanë shënuar rënie nga 2.757 raste në 2.460 raste, ose rënie prej 10.77% krahasuar me vitin paraprak, raste këto të cilat në këtë fillim vit vazhdojnë të mbeten edhe më tej shqetësuese”, shkruhet në komunikatën për media.
Policia ndër tjerash bëri thirrje që rastet e dhunës në familje të raportohen pa vonesë. /Kosovatimes/
