Nënkryetari i LDK-së, Lutfi Haziri, ka komentuar daljen e ulët në votimet e sotme në veri për për të shkarkuar ose jo katër kryetarët e komunave. Haziri ka theksuar se “mosdalja apo bojkoti duhet të jetë shqetësim shumë i madh për Qeverinë dhe Republikën”.
Nënkryetari i Lidhjes Demokratike të Kosovës, Lutfi Haziri, ka reaguar lidhur me daljen e ulët të qytetarëve në votimet e sotme në veri të vendit.
“Ky është “shkarkim plebishitar” i kryetarëve legalë, por pa legjitimitet. Lojaliteti ndaj ftesës së presidentit serb për bojkot nuk u përfill nga 85 + qytetarë. Ku mbeti de-eskalimi, përfundimi i bojkotit apo edhe dialogu me serbët e Kosovës në vend të dialogut me Serbi?!”, ka shkruar Haziri në Facebook.
Kryetari i Komisionit Qendror të Zgjedhjeve, Kreshnik Radoniqi, ka bërë të ditur detajet se pjesëmarrja e votuesve është minimale në katër komunat e veriut.
“Në Leposaviq kanë votuar 46 votues, në Zubin Potok shtatë votues, në Zveçan asnjë votues dhe në Mitrovicën e Veriut 32 votues”, ka thënë Radoniqi.
Në emër të KQZ-së ai i ka ftuar të gjithë qytetarët e këtyre komunave që ta shfrytëzojnë të drejtën e tyre për të marrë pjesë në procesin e votimit.
Kujtojmë që në katër komunat në veri të vendit votohet për shkarkimin ose jo të kryetarëve shqiptarë në Mitrovicë të Veriut, Zveçan, Zubin Potok dhe Leposaviq. Në listën e qytetarëve me të drejtë vote janë 46 mijë e 556 votues. /Kosovatimes/
