Partitë opozitare kanë kërkuar shtimin në rend dite diskutimin për të gjeturat e raportit të Departamentit Amerikan të Shtetit. Mirëpo ajo ka hasur në kundërshtim nga deputetët në votim me 40 kundër, 26 pro dhe 1 abstenim.
“Departamenti Amerikan i Shtetit ka prezantuar një raport, i cili ka të gjetura mjaft shqetësuese për Qeverinë dhe institucionet e Kosovës. Ka një përshkrim që ka korrupsion serioz, ku përshkruhet numri i ministrave të përfshirë në afera korruptive. Duke iu referuar raportit, nga 15 ministra 5 prej tyre janë në hetime dhe 2 zëvendësministra”, ka thënë Abelard Tahiri nga Partia Demokratike e Kosovës, teksa ka propozuar idenë.
Mimoza Kusari-Lila nga Lëvizja Vetëvendosje iu është kundërpërgjigjur Tahirit se raporti i DASH-it është i rëndësie të veçantë, por se të gjeturat e saj përfshijnë probleme të bartura edhe nga qeveritë e kaluara, transmeton RTKlive.
Arben Gashi nga Lidhja Demokratike e Kosovës gjithashtu ka përkrahur idenë për diskutimin rreth raportit të DASH-it, duke u fokusuar veçmas në të gjeturat rreth problemeve me pavarësi të gjyqësorit dhe kufizimet në liri të medieve.
“Në historinë e qeverisjes në Kosovë, asnjëherë vendi ynë dhe qeveria nuk ka marrë një klasifikim kaq të keq e të rëndë lidhur me gjendjen e vendit tonë”, ka thënë Besnik Tahiri nga Aleanca për Ardhmërinë e Kosovës.
