Kryetari i Aleancës për Ardhmërinë e Kosovës, Ramush Haradinaj, me rastin e 1 Majit ka reaguar për kushtet e punës të punëtorëve, si në sektorin publik, ashtu edhe në atë privat.
Ish-kryeministri Haradinaj, përmes rrjetit social ‘Facebook’ ka reaguar se qeveritë e përgjegjshme bëjnë çmos që të drejtat, kushtet dhe mundësitë e punëmarrësve të shënojnë progres, derisa, sipas tij, Qeveria Kurti ka bërë krejt çfarë nuk është dashur, duke ndikuar që gjendja në tregun e punës të mos shënojë asnjë progres.
“Paga minimale mbetet një formë e asistencës sociale. Paga mesatare mezi prek kufirin e mbijetesës. Në përgjithësi pagat në sektorin publik dhe atë privat mbetën më të ulëtat në rajon. Kjo madje në një periudhë kur inflacioni është i papranushëm për kapacitetin e mangët financiar dhe ekonomik në nivel vendi”, ka shkruar Haradinaj, teksa shtoi se punëmarrësit e sektorit më të madh, atij publik, vazhdimisht përballen me trajtim jomeritor dhe diskriminues.
Ai, tutje, vuri në pah se dialogu me sindikata është transformuar në një platformë monologu, ku Qeveria Kurti justifikon dështimet, shpërfaq arrogancën dhe monopolizon vendimmarrjen në lidhje me zhvillimin njerëzor dhe ekonomik.
“Pra edhe sot, më 1 maj, shohim më shumë retorikë, më shumë uniformitet, më shumë migrim, dhe më pak shpresë. Kjo është oferta e një qeverie populiste!”, ka shkruar Haradinaj. /Kosovatimes/
