Kylian Mbappe ka njoftuar për largimin e tij nga Paris-Saint Germain në fund të këtij sezonit.
Në një video të postuar në rrjetet sociale, ai ka shprehur emocionet e tij në lidhje me vendimin e marrë si dhe falënderimin për vitet e kaluara në klubin francez.
“Është një vendim me shumë emocione. Për shumë vite kam pasur rastin dhe nderin e madh të jem anëtar i klubit më të madh francez, një nga më të mirët në botë. Ky klub prestigjioz është një klub që do ta mbaj në kujtesë gjatë gjithë jetës sime. Gjatë këtyre shtatë viteve u përpoqa të jap versionin më të mirë të vetes”, ka thënë Mbappe në deklaratën e tij.
Edhe pse nuk ka specifikuar destinacionin e tij të ardhshëm, Mbappe ka konfirmuar se do të largohet nga Franca. Kjo ka shtuar spekulimet se ai mund të nënshkruajë me Real Madridin, një opsion që është përmendur nga ana e mediave për një kohë të gjatë.
