Inspektorati Policor i Kosovës do të hetojë dhe inspektojë konkursin e gradimit për rreshter në Policinë e Kosovës.
IPK përmes një njoftimi thotë se ka pranuar disa ankesa dhe informacione nga burime të ndryshme për mbarëvajtjen e procesit të konkursit me pretendime për shkelje të ndryshme.
E gjithë kjo ka ardhur, pasi Policia e Kosovës ka hapur një konkurs për gradimin e zyrtarëve të Policisë në gradën e rreshterit kurse më 04.05.2024 është mbajtur testi me shkrim për këtë konkurs, dhe se ka dyshime për shkelje në këtë konkurs.
“Hetuesit e Inspektorati Policor i Kosovës, fillimisht kanë analizuar dhe verifikuar informacionet fillestare për parregullsi në proces. Gjithashtu kryeshefi i IPK-së, Kushtrim Hodaj ka marrë vendim për krijimin e një ekipe të përbashkët inspektuese-hetuese për të hetuar dhe inspektuar tërë procesin e gradimit nga momenti i shpalljes deri në fazën aktuale”, thuhet në njoftimin e IPK-së.
Tutje IPK-ja thotë se varësisht nga të gjeturat do të ndërmerr veprimet e nevojshme bazuar në kompetencat dhe autorizimet ligjore.
