Kreu i qeveris së Kosovës Albin Kurti bashkë me ministrin Nenad Rashiq, sot ishin në Kamenicë, ku nga të dhënat e fundit tregojnë se banorët e kësaj komune i janë përgjigjur pozitivisht e pa hezitim thirrjes sonë për regjistrim.
“Kamenica është një nga shembujt më të mirë të bashkëjetesës ndëretnike dhe integrimit të komunitetit serb në Kosovë. Kjo po vërtetohet edhe me përqindjen e lartë të pjesëmarrjes së qytetarëve tanë të komunitet serb në procesin e regjistrimit të popullsisë”, tha Kurti.
Tashmë jemi në javën e fundit të procesit të regjistrimit të popullsisë. Deri tani janë regjistruar mbi 1,420,000 qytetarë në Republikën e Kosovës.
Me këtë rast Kurti falënderoi secilin regjistrues e mbikëqyrës për punën shembullore.
“Kjo punë është vlerësuar edhe nga ekipet mbikëqyrëse të Kombeve të Bashkuara, nga Komisioni Ekonomik për Evropë, UNECE, dhe nga Fondi për Popullsi, UNFPA. I inkurajoj që të vazhdojnë punën me përkushtim deri në përmbyllje të procesit”, tha ai.
Regjistrimi i popullsisë, i secilit prej nesh, sipas tij, nuk është thjesht evidentim për statistika, por do të shërbejë për politika të drejta e orientim të saktë në vendimet e masat, projektet e investimet që do të ndërmarrim në 10 vjetët në vijim. Me këtë rast ai u bëri thirrje qytetarëve të regjistrohen.
“Regjistrimi juaj është jetik për ju e për vendin, për planifikimin e të ardhmes sonë.
Ju bëj thirrje edhe një herë, në Kosovë e diasporë, juve të cilëve ende nuk jeni regjistruar, që ta shfrytëzoni këtë javë të fundit deri me 17 maj, për t’u regjistruar dhe kësisoj ta përmbyllim këtë proces sa më mirë”, tha Kurti. /Kosovatimes/
