Kryetari i Kuvendit të Kosovës, Glauk Konjufca, priti sot në takim zëvendëskryeministrin për Çështje Ekonomike, njëherazi ministër për Zhvillim Ekonomik i Malit të Zi, Nik Gjeloshaj.
Përmes një njoftimi për medie bëhet e ditur se kryetari Konjufca vlerësoi lart marrëdhëniet midis Kosovës dhe Malit të Zi, si dy shtete me raporte të mira bashkëpunimi, duke e konsideruar këtë si tregues të vullnetit dhe gatishmërisë për thellimin e këtyre raporteve.
“Kreu i Kuvendit vuri në pah se Kosova bashkëndanë dhe i qëndron përkrah synimeve zhvillimore dhe atyre të integrimit evropian të Malit të Zi. Sipas tij, ky qëndrim forcohet edhe më shumë prej faktit të nevojës së përparimit të rajonit tonë dhe dëshirës për t’i parë gjithnjë e më mirë bashkëkombësit tanë shqiptarë të Malit të Zi”, thuhet në njoftim.
Teksa biseduan për zhvillimet politike në Kosovë dhe Mal të Zi, kryetari Konjufca tha që me Gjeloshajn u pajtuan se zhvillimi dhe siguria e shteteve tona, si dhe e rajonit kërkon angazhim të pandërprerë në mbrojtje të sovranitetit, shtetit të së drejtës dhe demokracisë, kërkon qëndrim të palëkundur kundër agjendës dhe influencës ruse në rajon.
Zëvendëskryeministri Gjeloshaj, nga ana e tij, e falënderoi kryetarin Konjufca për pritjen, duke shprehur gatishmërinë e bashkëpunimit të mëtejmë për të avancuar interesat e përbashkëta. /Kosovatimes/
