Kryetari i Partisë Demokratike të Kosovës, Memli Krasniqi, ka ftuar të gjithë qytetarët që të regjistrohen, kur kanë mbetur edhe dy ditë deri në përmbyllje të këtij procesi të realizuar nga Agjencia e Statistikave të Kosovës.
Ai e ka vlerësuar këtë proces shumë të rëndësishëm për të ardhmen e vendit.
“Këtë javë, bashkë me familjen time, edhe ne e përfunduam procesin e regjistrimit të popullsisë. Një proces i shpejtë, i lehtë, por edhe jashtëzakonisht i rëndësishëm për të ardhmen e vendit tonë. Përmes regjistrimit të popullsisë, ne do të dimë saktë se sa janë dhe ku jetojnë qytetarët tanë anekënd vendit – por edhe në mërgatë”, ka shkruar Krasniqi në Facebook.
Tutje kreu i PDK-së ka thënë se përmes realizimit të këtij procesi do të merren të dhëna të vlefshme, mbi të cilat do të mund të planifikohet efektivisht politika zhvillimore për të gjithë qytetarët tanë, pa dallim, nëpër të gjitha qytetet dhe fshatrat.
“Andaj, nëse ende s’e keni bërë, ju ftoj që të shfrytëzoni edhe këto dy ditë të mbetura për t’u regjistruar”, ka shtuar Krasniqi. /Kosovatimes/
