Bashkimi Evropian i bëri thirrje Izraelit që të ndërpresë menjëherë operacionin ushtarak në Rafah, qytet në jug të Gazës, duke thënë se operacioni po pengon shpërndarjen e ndihmës humanitare, po shkakton më shumë uri, vuajtje njerëzore dhe po detyron më shumë banorë që të zhvendosen.
Deklarata e Shefi të Politikës së Jashtme të Bashkimit Evropian Josep Borrel vë në dukje të drejtën e Izraelit për t’u mbrojtur, por po ashtu thekson se Izraeli duhet të zbatojë ligjet ndërkombëtare dhe të mbrojë civilët.
“Bashkimi Evropian i bën thirrje Izraelit të tregojë vetëpërmbajtje për të mos e përkeqësuar gjendjen e rëndë humanitare në Gazë dhe të hapë sërish pikat e kalimit kufitar të Rahahut”, tha zoti Borrel. “Vazhdimi i operacionit ushtarak në Rafah do të çonte në mënyrë të pashmangshme
në një tendosje të madhe marrëdhënieve mes Bashkimit Evropian dhe Izraelit”, thuhej në njoftim.
Zoti Borrel i bëri thirrje Hamasit që të lironte pa vënë kushte personat që vazhdon të mbajë peng në Gazë.
Ushtria izraelite tha të mërkurën se forcat e saj kryen sulme ajrore mbi rreth 80 objektiva në gjithë Rripin e Gazës të martën, ndërsa trupa të tjera luftuan në pjesën lindore të Rafahut.
Sekretari i Përgjithshëm i Kombeve të Bashkuara Antonio Guterres tha të martën se ishte i zhgënjyer nga përshkallëzimi i operacionit ushtarak në dhe përreth Rafahut nga izraelitët, pasi afro 450 mijë palestinezë janë zhvendosur me forcë nga rajoni përgjatë javës së shkuar.
Javën e kaluar, ushtria izraelite intensifikoi bombardimet dhe operacione të tjera në Rafah ndërsa urdhëroi popullsinë që të evakuohej në zona të tjera të qytetit.
