Tre turistë spanjollë dhe një shtetas afgan u qëlluan për vdekje të premten në Bamyan, një qytet turistik në Afganistanin qendror, thanë burime zyrtare spanjolle dhe afgane. Ky është sulmi i parë ndaj turistëve të huaj në Afganistan që nga kthimi në pushtet i talebanëve në gusht 2011.
“Tre të huaj dhe një afgan u vranë” dhe “katër të huaj dhe tre afganë u plagosën” në sulmet me armë, tha zëdhënësi i Ministrisë së Brendshme, Abdul Mateen Qaniee , raporton AFP.
Në Madrid, një burim nga Ministria e Punëve të Jashtme bëri të ditur se tre të huajt e vrarë ishin spanjollë. “Tre spanjollë u vranë dhe të paktën një u plagos në një të shtëna në Afganistan”, tha burimi, i cili dëshiroi të mbetet anonim. Ai shtoi se ministria po përpiqet të sqarojë se çfarë ka ndodhur, të ndihmojë të lënduarit dhe të kontaktojë me familjet. Kryeministri Pedro Sanchez tha se ishte i tronditur nga vrasja e turistëve spanjollë dhe shtoi se po monitoronte situatën.
Në Kabul, një zëdhënës i Ministrisë së Brendshme tha se katër të dyshuar janë arrestuar. Burime spitalore thanë se katër të plagosurit ishin shtetas të Norvegjisë, Australisë, Lituanisë dhe Spanjës.
Nuk dihet ende se cili ishte motivi i sulmit. Bamyan është destinacioni kryesor turistik në Afganistan, në të cilin ka edhe një pjesë nën mbrojtjen e UNESCO-s.
