Partitë politike po flasin për zgjedhje të reja, por ende nuk ka dakordim se si të shkohet para kohe në zgjedhje. Partitë opozitare në Kuvend vazhdojnë të kenë qëndrime të ndryshme për mënyrën se si duhet rë shkohet në zgjedhje. PDK është pajtuar që në zgjedhje të shkohet nëpërmjet shpërndarjes së Kuvendit, por LDK e AAK kërkojnë dorëheqjen e kryeministrit Kurti ose shkarkimin e tij.
Shefi i Grupit Parlamentar të Partisë Demokratike të Kosovës, Abelard Tahiri, ka thënë se kanë mbetur edhe dy ditë “në dritaren kushtetuese” për të shkuar vendi në zgjedhje të parakohshme, ose në të kundërtën sipas tij, Qeveria duhet ta çojë mandatin në fund.
Pas mbledhjes së Kryesisë së Kuvendit, Tahiri ka theksuar se më së miri do të ishte sikur të shpërndahej Kuvendi dhe në shtator të këtij viti të zgjidhej qeveria e re.
“Sa i përket shpërndarjes së Kuvendit kanë mbetur edhe 2 ditë të dritares kushtetuese që vendit tonë t’i mundësohet që zgjedhjet të mbahen më 30 qershor ose 7 korrik. Këto dy ditë do t’i japin një epilog, e do të presim deri në momentin e fundit, që vendi të shkojë më zgjedhje të jashtëzakonshme që vjeshta ose shtatori ta zë vendin tonë me një kryeministër të ri që e nxjerr Kosovën nga kriza”, ka thënë ai.
Sipas tij, partitë politike kanë një reflektim për t’i mundësuar zgjedhjet e parakohshme nëpërmjet shpërndarjes së Kuvendit. Shefi i GP të PDK-së ka shtuar se nëse nuk shkohet në zgjedhje të parakohshme, Kuvendi do të vazhdojë me punën.
Kurse, shefi i Grupit parlamentar të LDK-së, Arben Gashi, ka thënë se e vetmja zgjidhje është dorëheqja e Kryeministrit.
“Po bojkotohet puna e Kuvendit. Sa i përket zgjedhjeve është zgjidhja është dorëheqja e kryeministrit. Zgjidhja duhet të jetë dorëheqja. Tani shkuarja në zgjedhje mese planifikon vendi të shkon në zgjedhje koha për të shkuar në korrik është drejt momenteve të veta të fundit”, ka deklaruar Gashi.
Shefi i Grupit parlamentar AAK, Besnik Tahiri, ka thënë se zgjedhjet do të ndodhin atëherë kur do të shkarkohet kjo qeveri e dëmshme për Kosovën ose me dorëheqjen e Kryeministrit.
“Kërkesën për shpërndarjen e parlamentit AAK-ja, do të dërgoj një përgjigje me shkrim për të konfirmuar se zgjedhjet do të ndodhin atëherë kur do të shkarkohet kjo qeveri e dëmshme për Kosovën ose me dorëheqjen e kryeministrit”, ka thënë Tahiri.
Sipas tij, dorëheqja duhet të ndodh deri në gusht.
