Futbollisti i Kombëtares së Kroacisë, Andrej Kramaric, ka deklaruar se skuadra është plotësisht e fokusuar te ndeshja e ardhshme me Shqipërinë dhe nuk po mendon ende për përballjen me Italinë, e cila do të zhvillohet më vonë.
Të dy kombëtaret do të përballen të mërkurën në ndeshjen e xhiros së dytë të Grupit B. Shqipëria vjen në këtë ndeshje pas një humbje të ngushtë ndaj Italisë me rezultatin 2-1, ndërsa Kroacia ka pësuar një humbje të thellë nga Spanja me rezultatin 3-0.
“Nuk dua që të bëj llogari për pikët që na duhen për të kaluar grupin. Nuk kemi as kohë e as dëshirë të bëjmë të tilla llogari. Tani mendojmë vetëm për një fitore në takimin e radhës pasi pa atë nuk mund të shkojmë gjëkundi. Ndeshja e radhës është më e rëndësishmja, prandaj them se për momentin Shqipëria ka vëmendjen tonë të plotë. Prej nesh priten tri pikët, vetëm pas këtij dueli duhet të mendojmë për Italinë”, ka thënë futbollisti kroat.
