Albinot Maloku, njohës i zhvillimeve politike, ka folur për situatën politike në vend, sidomos për ngjarjet kohëve të fundit, pas rekomandimeve të kryediplomatit të BE-së, Josep Borrell, për heqjen e masave ndaj Kosovës.
Ai në ‘InfoPlus’ lidhur me këtë çështje tha se masat e vëna nga BE kanë rënduar vendin tonë si në rrafshin ekonomik, por edhe në atë politik e diplomatik.
“Këto masa patën peshën e madhe në kuadër të asaj që Kosova nuk do të duhej ta përjetonte edhe për shkak të rënies së imazhit”, tha Maloku.
Ai më tej tha se këto masa erdhën si pasojë e veprimeve të caktuara nga ana e institucioneve vendore, por që shtoi ai, paralelisht kësaj, edhe BE-ja u kritikua nga instancat evropiane, si PE, etj., sipas të cilëve këto masa konsideroheshin të njëanshme, ngase, sipas tij, këto masa ndikuan në uljen e peshës së dialogut Kosovë-Serbi.
Maloku ishte kritik, jo vetëm ndaj bartësve të institucioneve vendore, po ashtu edhe ndaj bartësve të institucioneve evropiane.
