Shefi i grupit parlamentar të AAK-së, Besnik Tahiri, i cili është duke marrë pjesë në sesionin verore të Asamblesë Parlamentare të Këshillit të Evropës, në kuadër të delegacionit të vendit, lëshoi një alarm për një angazhim më të madh për anëtarësim në KE.
“Duhet të punojmë për ta ndërtuar një momentum të ri. Momentumin që e kemi pasur nuk e kemi më. Dhe, për ta rikthyer agjendën e integrimit dhe për të shtyrë përpara vendimin e Komitetit të Ministrave, duhet një angazhim shumë i madh. Një momentum i ri i cili do të mundësojë anëtarësimin e Kosovës”, tha ai.
Ai tha se anëtarësimi duhet të ndodhë për shkak se raporti është decidiv që Kosova e meriton anëtarësimin.
“Ndërsa, sa i përket kushtëzimeve duhet të trajtohen seriozisht nga Qeveria e Kosovës dhe të ketë një veprim të përgjegjshëm në këtë aspekt. Një rrugë jo e lehtë është përpara dhe me plotë sfida, por jam optimist që anëtarësimi do të ndodhë”, tha ai. /Kosovatimes/