Belgjika do të bëjë gjithçka për të fituar kundër Ukrainës në ndeshjen e fundit të grupit, pavarësisht se një barazim i mjafton për të arritur në 1/16 e Euro 2024, ka thënë të martën trajneri Domenico Tedesco.
Situata në Grupin E është jashtëzakonisht e ngushtë, me të katër skuadrat që kanë nga tri pikë.
Ky është takimi i parë mes Ukrainës dhe Belgjikës në këtë turne. Të dy skuadrat janë rikuperuar nga humbjet e para në grup për të fituar ndeshjet e tyre të dyta. Pavarësisht mundësisë për të kaluar më tej me një barazim, Tedesco ka theksuar se skuadra e tij synon vetëm fitoren.
“Ne jemi të sigurt që kemi nevojë për një ndeshje të madhe nesër, sepse Ukraina është një ekip i madh. Ne pamë disa ndeshje të tyre, jo vetëm gjatë kualifikimeve kundër Anglisë, por tani edhe ndeshjet këtu në Euro 2024. Ne do të dalim për të fituar ndeshjen. Duhet të fokusohemi në lojën tonë dhe më pas rezultati vjen automatikisht”, ka thënë Tedesco.
