Në kuadër të takimeve që po zhvillon në Strasburg, ministrja e Punëve të Jashtme dhe e Diasporës e Republikës së Kosovës, Donika Gërvalla, ka takuar presidentin e Asamblesë Parlamentare të Këshillit të Evropës (PACE), Theodoros Roussopoulos, me të cilën ka diskutuar rreth finalizimit të procesit të anëtarësimit të plotë të Republikës së Kosovës në Këshillin e Evropës.
“Zëvendëskryeministrja Gërvalla, e shoqëruar edhe nga nënkryetarja e Kuvendit të Kosovës, Saranda Bogujevci dhe ambasadori Lulzim Hiseni, shprehën mirënjohjen e thellë për rolin dhe mbështetjen e presidentit në sigurimin e një procesi të drejtë dhe meritokratik brenda PACE”, thuhet në komunikatën e MPJD-së dërguar medieve.
Në njoftim, ndër të tjera, bëhet me dije se ministrja Gërvalla theksoi vlerësimin e madh të Kosovës për punën e përkushtuar të PACE dhe rikonfirmoi angazhimin e palëkundur të Kosovës për t’i përmbushur të gjitha detyrimet pas anëtarësimit në këtë organizatë ndërkombëtare.
“Ministrja Gërvalla nënvizoi rolin thelbësor të presidentit të PACE në bashkëpunim me Komitetin e Ministrave për të siguruar që anëtarësimi i Kosovës në KiE të trajtohet në mënyrë të drejtë dhe në përputhje të plotë me opinionin e PACE”, është thënë në komunikatën e MPJD-së. /Kosovatimes/
