Kryetari i partisë bullgare GERB dhe ish-kryeministër i atij vendi, Bojko Borisov, tha sot se asnjë parti nuk mund të formojë një qeveri të qëndrueshme.
Ai u tha gazetarëve se situata aktuale po pengon përparimin e Bullgarisë drejt anëtarësimit në Eurozonë, një qëllim që ai beson se mund të arrihet nëse do të kishte një qeveri të qëndrueshme të udhëhequr nga GERB, raporton Novinite. Ai kritikoi fushatën parazgjedhore të disa partive, duke thënë se partitë politike janë më të fokusuara në përfitimin e avantazhit zgjedhor sesa në qeverisjen efektive.
Portali raporton se pritet që presidenti Rumen Radev pas konsultimeve politike me të shtatë grupet parlamentare të njoftojë se kujt do t’ia besojë mandatin. Zgjedhjet parlamentare në Bullgari u mbajtën në të njëjtën kohë me zgjedhjet për Parlamentin Evropian më 9 qershor dhe koalicioni GERB-SDS i ish-kryeministrit Bojko Borisov mori më shumë vota dhe fitoi 68 nga gjithsej 240 mandate.
Lëvizja për të Drejta dhe Liri (DPS) fitoi 47 mandate dhe lista Vazhdojmë Ndryshimet – Bullgaria Demokratike (PP-DB) fitoi 39 mandate, shkruan portali Novini. “Ringjallja” fitoi 38 mandate dhe Partia Socialiste Bullgare (BSP) 19. Pas tyre janë “Ima Takav Narod” (ITN) me 16 mandate dhe “Veliçina” me 13.
