Mërgata Shqiptare në Botë, kërkoi nga të gjitha subjektet shqiptare anembanë të bashkohen në realizimin e marrëveshjeve të arritura deri më tani në të gjitha hapësirat shqiptare. Ata rikujtojnë se në tri luftërat ishin të bashkuar për çlirim nga okupatorët tanë, që na ndanë prej më shumë se një shekulli. Megjithatë partitë politike si në Luginë të Preshevës dhe Maqedoni nuk ngulën këmbë në realizimin e plotë të marrëveshjeve.
“Ende asgjë nuk doli në sfond nga Marrëveshjet. Ndërkaq, me ndarjen e partive politike, me kundërshtimin e njëra-tjetrës, në të gjitha trojet shqiptarë, vuajtja vazhdon dhe nuk është zbatuar e realizuar ende ajo për të cilën është derdhur gjaku dhe për të cilën janë nënshkruar marrëveshjet edhe me ndihmën e obstruksioneve shtetërore, edhe në Kosovë edhe në Maqedoni edhe në Serbi”, theksojnë ata.
Mërgata shqiptare kërkoi që interesi kombëtarë duhet të jetë mbi interesin personal e partiak.
“E themi këtë me plot përgjegjësi, sepse, cili do që ka ardhur në pushtet, është kundërshtuar, shumë herë, edhe me të padrejtë me qëllimin e pengesës për mosarritjen e asaj më sublimes, më të lartës, pavarësisë e në shtete tjera – barabarësisë me popujt tjerë, siç u bë me marrëveshjet. Krejt faji i përçarjes mes shqiptarëve, në gara për të qenë i pari. Dhe, deri sa vazhdon gara, në rregull, por me përfundimin e zgjedhjeve – garat marrin fund, të gjithë duhet të jenë të bashkuar, ndryshe nuk ecet përpara në asnjë drejtim”, thekson MShB. Me këtë rast mërgata shqiptare ftoi të gjithë shqiptarët, kudo që jetojnë në mbarë rruzullin tokësor, që të bashkohemi nën një ideal, për realizimin e Pavarësisë së Kosovës, nga që, përkundër shpalljes së saj, ende nuk është vënë në jetë plotësisht.
“Që të jenë të përbashkuara të gjitha subjektet shqiptare me kryetarët e tyre dhe individët në një vend për të realizuar Marrëveshjet e nënshkruara në Ohër të Maqedonisë në vitin 2001. Të bashkohen në një vend të gjithë shqiptarët e Preshevës, Medvegjës e Bujanocit e të lënë anash ndasitë dhe interesat individuale e partiake karshi atyre kombëtarë. Një ftesë e tillë shkon edhe për partitë politike shqiptare në Mal të Zi, të cilat edhe sot e kësaj dite janë kundër njëra-tjetrës”, thekson MShB. Po ashtu ata i bëjnë thirrje që të kontribuojmë në këtë drejtim dy akademitë, në Shqipëri e në Kosovë, të gjitha partitë politike e tjera dhe Mërgatën Shqiptare në Botë, që të bëjmë maksimumin për të qenë të bashkuar në realizimin e të drejtave të plota të popullit shqiptar, kudo që jeton.
“Ju kryetarë partish, ose bashkohuni ose do mbeteni në listën e zezë kombëtare për mosveprimin tuaj kombëtar. Nuk kemi nevojë të shahemi e as të grindemi deri në rrahje në kuvendet e shteteve tona. Vëni gishtin kokës”, theksuan ata. /Kosovatimes/
