Kjo që do të lexoni më poshtë nuk është përmbajtje teologjike, por përsiatje e pastër njerëzore për sfidat e jetës në përballje me djajtë e zi në vendlindje dhe perëndim. Djajtë janë të njëjtë pa dallim ngjyre dhe lloji, por djalli me një sy dallon për marrëzitë e tij, ani pse në popull më shumë njihet si djalli (dreqin) lara-lara.
Dallimi mes engjëjve dhe djajve
Të gjithë njerëzit besojnë në Zot edhe pse nuk e shohin, besojnë në Engjëj dhe në Djaj që nuk i shohin, por fatkeqësisht në ditët e sotme gjithnjë e më shumë po ju besojnë djajve me fytyrë njeriu, e shumë më pak ju besojnë njerëzve të mirë që janë engjëj të vërtetë mbi sipërfaqen e tokës me të cilët takohen çdo ditë në jetën e përditshme.
Besimtarët e të gjitha konfesioneve fetare i besojnë ferrit dhe parajsës në botën tjetër, ani pse çdo ditë e përjetojnë parajsën dhe ferrin në jetën e tyre të përditshme! Secili nga ne i takojmë engjëjt dhe djajtë, nganjëherë pa ju kushtuar vëmendje të caktuar.
Engjëj janë të gjithë ata që mendojnë pozitivisht, që bëjnë punë të mira për veten, familjen dhe të tjerët, që reflektojnë shpresë dhe pozitivitet, që krijojnë frymë unifikuese në lokalitetin ku jetojnë.
Kurse djaj janë shpirtzinjtë dhe shpirtëligët, janë ndarësit dhe përçarësit e rrethit shoqërorë, janë egoistët që e urrejnë çdo vlerë dhe çdo të arritur të të tjerëve. Djajtë janë krijesat më të këqija dhe fatzeza mbi sipërfaqen e tokës.
Djajtë trillojnë, shpifin dhe fantazojnë ndaj njerëzve më të urtë dhe më të mirë, më të ditur dhe dhe më të ngritur, më të pastër dhe më të dëlirë në mesin e shoqërisë sonë.
Përderisa engjëjt qëndrojnë pranë dhe i mbrojnë njerëzit e mirë, djalli rri i zgjuar për t’i atakuar njerëzit e mirë.
Përderisa engjëjt janë mbrojtës shpirtëror dhe fizik i njerëzve të mirë, djajtë veprojnë në errësirë apo thënë ndryshe, janë nëntoka e njerëzimit!
Engjëllin mbrojtës mund ta përkufizojmë si energji pozitive të njeriut të mirë e cila manifestohet me dashuri njerëzore, kurse djalli është varfëria shpirtërore e njeriut të keq e cila manifestohet me veprimtari të errët dhe destruktive ndaj atyre që kanë vlera dhe veti të larta njerëzore.
Njeriu i mirë ka nevojë për mbrojtje të përhershme nga engjëjt
Njeriu i mirë me ndjenja pozitive shpirtërore dallon sikur dita me natën me njeriun pa ndjenja apo me prirje negative.
Njeriu me ndjenja pozitive (engjëlli) nuk ka ndjenja negative në shpirtin e tij, kurse njeriu i keq me ndjenja negative (djalli) shkakton urrejtje dhe përçarje në mesin e njerëzve shpirtmirë. Për këtë arsye njerëzit e mirë vuajnë shumë dhe gjithnjë kanë nevojë për mbrojtje nga engjëjt në tokë!
Sikurse shteti që ka nevojë për mbrojtje ushtarake, edhe njeriu i mirë ka nevojë për engjëjt e tij mbrojtës.
Njeriu si qenia më e zhvilluar dhe më e përsosur në rruzullin tokësorë ka nevojë për mbrojtje të përhershme nga atakimet e krijesave të liga apo njerëzve shpirtëkëqinjë, të cilët i pengon çdo gjë e mirë tek të tjerët!
Sa më shumë që të bashkohen njerëzit e mirë mes vete, aq më larg do të qëndrojë djalli prej tyre!
Djalli qoftë edhe me një sy, prapë është i rrezikshëm dhe i paparashikueshëm për rrethin shoqërorë! Andaj, nëse dëshironi të jeni të sigurt në rrugëtimin tuaj jetësorë bashkohuni o njerëz të mirë.
Vëllezër dhe motra shqiptare bashkohuni rreth njerëzve të mirë dhe duajeni njëri-tjetrin pa interes siç ishit në të kaluarën e afërt kur e ndanit gjithçka me njëri-tjetrin dhe padyshim do të jeni më të lumtur dhe më të gëzuar se që jeni sot të ndarë dhe të katandisur!
Disa herë në jetën time jam përballur me djajë të llojeve dhe ngjyrave të ndryshme, por më i rrezikshmi më doli djalli me një sy, rrefimin për të cilin do ta shpalosi në romanin tim të parë me të njëjtin emër, ‘Djalli me një sy’.
