Pjesëmarrjen në “Forumin e Paqes” në Paris, presidentja e vendit, Vjosa Osmani, e ka shfrytëzuar edhe për takime me liderë nga vende të ndryshme botërore.
“Bashkëbisedime me liderë nga vende të ndryshme të botës, aleatë dhe miq të rinj të Kosovës, gjatë Forumit të Paqes në Paris”, ka shkruar presidentja në Facebook.
Ndërkaq, në një postim në “Twitter”, presidentja theksoi se ka biseduar me kolegë nga Estonia, Liberia, Hungaria dhe Maqedonia e Veriut.
“Bashkëpunimi me miqtë dhe aleatët është i një rëndësie të madhe sepse ne duam të kapërcejmë sfidat e përbashkëta në Evropë dhe më gjerë”, ka shkruar Osmani.
Ajo, të premten, në panelin e këtij forumi ku u fol për agresionin e Rusisë në Ukrainë, ka theksuar se agresori duhet të ndahet nga viktima, teksa ka rikujtuar se Kosova është treguar storie suksesi falë partneritetit me faktorin ndërkombëtar. /Kosovatimes/
