Pesë ministri në Serbi nënshkruan të mërkurën një memorandum mirëkuptimi në fushën e aplikimit të energjisë bërthamore, bashkë me 20 institucione dhe institute shkencore-akademike, bëri të ditur Qeveria e Serbisë.
Me këtë veprim, siç paralajmëroi më herët Ministria e Minierave dhe Energjetikës e Serbisë, filloi debati publik për mundësitë e përdorimit të energjisë bërthamore në Serbi, në kohë paqeje.
Në nënshkrimin e memorandumit mori pjesë edhe kryeministri i Serbisë, Millosh Vuçeviq, i cili tha se ky hap korrigjon gabimin e bërë në vitet ‘80 të shekullit të kaluar, kur shteti ndaloi prodhimin e energjisë bërthamore.
Ai iu referua një moratoriumi të vitit 1989 mbi ndërtimin e termocentraleve bërthamore në territorin e Serbisë, i cili daton nga periudha e Jugosllavisë socialiste.
Vuçeviq tha se është e mundur që të zhvillohet energjia bërthamore, pa rrezikuar mjedisin dhe shëndetin e qytetarëve të Serbisë.
“Besoj se ky është një shans i madh për zhvillimin e Serbisë. Pres nga ju që të punoni në mënyrë transparente dhe të hapur”, tha Vuçeviq, transmeton Shërbimi i Ballkanit i Radios Evropa e Lirë.
Memorandumin në Pallatin e Serbisë në Beograd e nënshkruan Ministria e Mbrojtjes së Mjedisit, Ministria e Minierave dhe Energjisë, Ministria e Shkencës, Zhvillimit Teknologjik dhe Inovacionit, Ministria e Shëndetësisë dhe Ministria e Arsimit, bashkë me Elektrodistribucionin e Serbisë, Rrjetin Elektrik të Serbisë, Institutin e Shkencave Bërthamore Vinça etj.
Zyrtarët në Serbi janë duke shqyrtuar zhvillimin dhe përdorimin e energjisë bërthamore në përpjekje për të reduktuar emetimet e dioksidit të karbonit dhe për t’u zhvendosur nga karburantet fosile te burimet e rinovueshme të energjisë.
Serbia është nënshkruese e Deklaratës për Agjendën e Gjelbër, e miratuar në vitin 2020 në Samitin e Sofjes.
Me këtë deklaratë, Serbia dhe vendet e tjera të Ballkanit Perëndimor janë zotuar se do të heqin dorë nga qymyri deri në vitin 2050.
Sipas Agjencisë së Energjisë në Serbi, ky vend, për prodhimin e energjisë elektrike, mbështetet kryesisht në termocentralet me qymyr.
