Ministrja e Drejtësisë, Albulena Haxhiu, thotë se miratimi i ligjit për Këshillin Prokurorial të Kosovës do ta riorganizojë Këshillin Prokurorial, eliminim të korporatizmit dhe grupeve klanore në Këshill, e me rritje të llogaridhënies, integritetit dhe profesionalizmit në sistem.
Haxhiu, në një postim në Facebook, deklaroi se pas një maratone, të shoqëruar me jo pak sfida e pengesa, më në fund votohet versioni i ri i ndryshimeve të Ligjit për Këshillin Prokurorial të Kosovës.
“Ndryshimet e votuara sot në lexim të dytë në Kuvend, janë bërë në përputhje të plotë me rekomandimet e Komisionit të Venedikut, por edhe me aktgjykimin e Gjykatës Kushtetuese. Mbetemi të përkushtuar e të angazhuar në rrugën tonë reformuese, për një sistem llogaridhënës e profesional, të besueshëm dhe të pandikueshëm, e të qasshëm për të gjithë qytetarët”, shkruan Haxhiu. /Kosovatimes/
