Ndërkohë, sot paradite, në Dhomat e Specializuara të Kosovës në Hagë, vazhdoi dëshminë ish-shefi i Shtabit të UÇK-së, Bislim Zyrapi.
Fillimisht u është përgjigjur pyetjeve të prokurorisë, por edhe atyre të gjyqtarit e avokatëve mbrojtës të të akuzuarve.
Në e 10-të, në Gjykatën Speciale, dëshmoi Bislim Zyrapi, i cili u mor në pyetje sërish nga prokuroria, por edhe gjyqtari Christoph Barthe. Zyrapi tha se Shtabi i Përgjithshëm i UÇK-së kishte një problem pasi komandantët e zonave gjatë vitit 1998, vepronin pa u koordinuar me këtë organ.
“Sulmi që është bërë në Ballaqefc është bërë pa lejen e shtabit dhe pa dritën e gjelbër të drejtorisë operative. Ka ndodhur, nuk e di a ishte gushti a cili muaj që është bërë sulmi në Ballaqefc në mihjen sipërfaqësore ku komanda e zonës nuk ka kërkuar një pëlqim për një veprim të tillë”, tha Bislim Zyrapi ish shefi i Shtabit të UÇK-së.
Zyrapi tha se Gjykata Ushtarake u krijua për ta trajtuar çështjen e kolaboracionistëve, derisa u pyet nëse di që gjykata, përveç rasteve të ushtarëve, ka trajtuar edhe çështje të civilëve.
“Atë duhet ta dijë Sokol Dobruna se unë nuk jam marrë me atë çështje…..”, tha Zyrapi
Dëshmitari u pyet edhe se si Azem Syla që në pjesën më të madhe të kohës ka qëndruar në Shqipëri, pati mundësi të mbikëqyrte sektorin juridik të Shtabit të Përgjithshëm.
Zyrapi tha se zëvendësit kanë punuar dhe mbikëqyrur këtë sektor, e që ishin Jakup Krasniqi e Sokol Bashota.
Ndërsa përgjegjës i Drejtorisë së Policisë Ushtarake, sipas dëshmitarit, ishte Fatmir Limaj.
Pas një ndërprerjeje të dëshmisë me kërkesë të avokatit të Kadri Veselit, Ben Emerson, që kërkoi të konsultohet, pa praninë e dëshmitarit, Zyrapi u pyet më pas lidhur me rolin e Hashim Thaçit, njësisë speciale të UÇK-së e të tjera.
Gjatë kundërpyetjeve, Zyrapi është pyetur edhe nga avokati Luka Mishetiq, nëse ka pasur ndonjë njësi gjatë luftës e në veçanti më 1998 që ka përdorur telefona satelitorë.
Kjo u mohua nga dëshmitari Zyrapi, i cili dëshminë e tij do ta vazhdojë edhe të mërkurën.
