Në Rrasë të Koshares, sot pati ndjenjë krenarie nga ata që dy dekada e gjysmë më parë, i dolën përballë armikut. Me vendosjen e një pllake, ish-pjesëtarë të UÇK-së përkujtuan bashkëluftëtarin e tyre, dëshmorin Fadil Maloku.
Dy dekada e gjysmë pas rënies së luftëtarit të lirisë Fadil Maloku në Rrasë të Koshares, bashkëluftëtarë e familjarë, i ngritën pllakën përkujtimore në nderim të veprës heroike.
“Kur vjen njeriu në këtë vend është problem edhe me e përshkru, janë ndjenjat plot emocione në këto pjesë kur i kujton. Tash me i thanë dikujt ka qenë bora deri këtu”, tha Arif Maloku, bashkëluftëtar.
“Ne pjesëtarët e Njësisë të gjithë jemi krenarë me veprën e Fadilit, një gjigant i madh, profesionalist dhe mund të them se veç krahët që nuk i ka pas”, tha Idriz Bala – ish kom i NJSSHZ.
“E kam pasur rastin ta takoj kur ka ardhë në Njësinë Speciale, ka qenë një djalë i përgatitur shumë, një djalë patriot”, tha Rexhep Daci, bashkëluftëtar.
“Ka qenë shtyllë e frontit të luftës, djem të pamposhtur dhe do t’i përkujtoi populli siç i kujton Mic Sokolin edhe Oso Kukën n’flakë t’barotit”, tha Hysni Neziri, bashkëluftëtar.
“Jetoj me Fadilin qe 25 vjet, për mua ende nuk ka vdekur e as do të vdes asnjëherë sikurse gjithë dëshmorët e tjerë”, thotë Jeton Syla, bashkëluftëtar.
“I falënderoj të gjithë bashkëluftëtarët dhe pjesëmarrësit që kanë ardhur sot këtu edhe lavdi krejt dëshmorëve”, thotë Fatos Maloku, nipi i Fadilit.
Njëri ndër celulat e para të UÇK-së, heroi i Kosovës, Fadil Maloku ishte ushtar i Njësisë Speciale “Shqiponjat e Zeza” ndërsa ra si luftëtar i Brigadës 138 Agim Ramadani.