Mbrëmë ka pasur të shtëna me armë zjarri në Loznicë, qytet në perëndim të Serbisë. Gjithçka ka ndodhur gjatë një kontrolli rutinë të taksive nga pjesëtarët e policisë rrugore, transmeton Telegrafi .
Disa të shtëna nga taksia janë qëlluar në drejtim të punonjësve të policisë. Si pasojë e plagëve të marra njëri prej policëve ka ndërruar jetë, ndërsa tjetri është plagosur rëndë.
“Në taksi kishte shtetas të huaj, që supozohej se ishin të kombësisë shqiptare, të cilët qëlluan në drejtim të policisë rrugore”, tha një burim i njohur me rastin për Agjencinë Rajonale të Lajmeve të Informacionit (RINA).
Një i dyshuar është arrestuar, një tjetër është në kërkim
“Sipas informacioneve të para nga terreni, një polic ka ndërruar jetë si pasojë e lëndimeve në atë ballafaqim, ndërsa një pjesëtar tjetër i MPB-së ka pësuar lëndime të rënda fizike, por është në gjendje stabile”, ka shtuar burimi.
Njëri nga të dyshuarit dyshohet se është ndaluar në vendin e ngjarjes, ndërsa tjetri është duke u kërkuar intensivisht. Në kërkim janë përfshirë edhe helikopterët e policisë.
Një numër i madh i pjesëtarëve të MPB-së janë në terren duke punuar për ndriçimin e gjithë rastit.
