Një gjykatë e Apelit në Bukuresht ka vendosur që ndikuesi i diskutueshëm Andrew Tate dhe vëllai i tij Tristan duhet të qëndrojnë në Rumani ndërkohë që ata presin gjykimin për akuzat për trafikim njerëzor dhe përdhunim.
Gjykata rrëzoi një vendim që lehtësoi kufizimet për Tate dhe vëllain e tij, duke i lejuar ata të udhëtojnë lirshëm brenda Bashkimit Evropian, shkruan AP.
Çfarë tha gjykata?
Në vendimin e saj gjykata “refuzon si të pabazuar kërkesën e të pandehurit që detyrimi për të mos u larguar nga territori i Rumanisë të zëvendësohet me detyrimin për të mos dalë nga kufijtë territorialë të Bashkimit Europian”.
Vendimi pasoi ankesën e prokurorit. Vëllezërit Tate janë nën mbikëqyrjen gjyqësore në Rumani dhe statusi i tyre rishikohet çdo 60 ditë.
Eugen Vidineac, avokati i vëllezërve Tata, ka bërë të ditur se klientët e tij do të respektojnë plotësisht vendimin e gjykatës.
Akuzat kundër Tate
Andrew Tate, një burrë 37-vjeçar i njohur për pikëpamjet e tij mizogjene, u arrestua me vëllain e tij 36-vjeçar dhe dy gra rumune në fund të vitit 2022. Ata u arrestuan nën dyshimin e trafikimit të qenieve njerëzore, përdhunimit dhe formimit të një grupi kriminal për shfrytëzimi seksual i grave.
