Izet Sadiku drejtor i Drejtorisë së Shëndetësisë në Komunën e Prishtinës ka njoftuar se po vazhdon procesi i dezinsektimit hapësinor në Prishtinë dhe fshatrat përreth.
Sadiku përmes një lidhje të drejtpërdrejtë për emisionin e mëngjesit ‘Mirëmengjesi Kosovë’ në RTK ka njoftuar se procesi i dezinsektimit në Prishtinë është në përfundim të fazës së dytë dhe pritet që të fillojë faza e tretë, por e gjitha kjo varet nga kushtet meteorologjike.
“Këtë vit dallim prej viteve të tjera kemi rritur numrin e hapësirave që bëjmë dezinsektimin, diku përreth 150 hektarë, kemi futur edhe lagje tjera dhe fshatra që nuk kanë qenë më parë pjesë e procesit të dezinsektimit”, është shprehur Sadiku.
Gjithashtu, Sadiku shtoi se procesi i dezinsektimit është shumë i rëndësishëm për qytetarët e Komunës së Prishtinës, pasi që më anë të këtij procesi synohet eliminimi i insekteve, me qëllim të pengimit të bartjes së shumë sëmundjeve ngjitëse, që sipas tij përgjegjëse për të cilat janë insektet.
Tutje, drejtor i Drejtorisë së Shëndetësisë i këshilloj qytetarët që gjatë orëve kur ndodh procesi i dezinsektimit t’i kenë të mbyllura dritaret dhe që të mos kenë kontakt me mjetin dezinsektues duke qenë se mund të shkaktojë reaksione alergjike, sidomos ngacmime të mukozës, syve, sistemit respirator dhe lëkurës.
Kujtojmë se procesi i dezinsektimit kalon nëpër 6 faza dhe sipas Sadikut do të zgjat deri në fund të gushtit.