Analistja politike Ivana Stradner, këshilltare në Fondacionin për Mbrojtjen e Demokracive në Uashington, paralajmëroi për “propagandë” në Serbi dhe shpërndau në rrjetet sociale një foto të titullit në portalin “Politika”, ku thuhet: “Si Sarajeva dhe Prishtina po përgatitet për luftë kundër Rusisë”.
Ajo ka komentuar edhe reagimin e zyrtarëve serbë lidhur me vrasjen e një polici në Loznicë, duke thënë se ka kohë që janë krijuar kushtet për një narrativë për “grupet vehabiste” në Kosovë dhe Bosnjë e Hercegovinë. Ajo beson se Serbia po “përgatitet për një tjetër përshkallëzim në Ballkan”.
Krahas imazhit të shkrimit në portalin “Politika”, Stradner ka shkruar:
“Propaganda serbe thotë se Kosova dhe Bosnja e Hercegovina po përgatiten për luftë kundër Serbisë. Në fakt, qeveria e Serbisë po përgatitet për një tjetër përshkallëzim në Ballkan dhe këtë vit oficerët e inteligjencës amerikane paralajmëruan përshkallëzime të reja në rajon”.
Stradner po ashtu ka deklaruar se ministri i Brendshëm i Serbisë ka njoftuar se në Serbi ka ndodhur një tjetër “sulm terrorist”.
Përkatësisht, ministri i Punëve të Brendshme Ivica Daçiq në lidhje me sulmin ndaj policisë në Loznicë tha se ka dyshime se “është një sulm terrorist dhe një tentativë e organizuar që vjen nga Kosova dhe Metohia nga strukturat shqiptare”.
Stradner gjithashtu e sheh këtë si vendosjen e skenës për përshkallëzimin e mundshëm.
“Gjithashtu, Rusia dhe Serbia kanë vendosur kushte prej javësh për informacione për “grupet vehabiste” në Kosovë dhe Bosnjë e Hercegovinë. Shumë në Perëndim nuk dinë t’i lidhin pikat, “tha ajo.
