Presidentja e Kosovës, Vjosa Osmani, ka shprehur keqardhje që nuk është në Prishtinë për ta pritur në takim ministren e Jashtme të Japonisë, Kamikawa Yoko e cila sot nis zyrtarisht vizitën në Kosovë. Megjithatë ajo thotë se ministren Yoko e ka takuar muajin e kaluar, ku edhe është konfirmuar mbështetje e Japonisë për vendin tonë.
“Ministrja e Jashtme e Japonisë, KamikawaYoko fillon sot vizitën e saj në Kosovë, e më vjen keq që nuk mund të jem atje për shkak të vizitës sime në Mbretërinë e Bashkuar. Por, vetëm muajin e kaluar, pata kënaqësinë ta takoj në Samitin e Grave Lidere në Itali. Ne patëm një diskutim të gjatë për aleancën e fortë ndërmjet Kosovës dhe Japonisë, një partneritet që jemi të përkushtuar ta forcojmë”, ka shkruar Osmani në rrjetin shoqëror X.
Kosova, siç thotë ajo, e vlerëson thellësisht mbështetjen e Japonisë gjatë viteve dhe pret bashkëpunim edhe më të madh në të ardhmen.
Ndryshe, ministrja Yoko, sot viziton Kosovën në 15 vjetorin e vendosjes së marrëdhënieve diplomatike ndërmjet dy vendeve.
Ajo përmes një mesazhi para se të vijë në Kosovë, është shprehur e kënaqur që mund ta vizitojë Kosovën si ministre e Jashtme e Japonisë për herë të parë në këtë vit historik që shënon 15 vjetorin e vendosjes së marrëdhënieve diplomatike ndërmjet Japonisë dhe Kosovës.
Kryediplomatja japoneze do të ketë takime me kryeministrin Albin Kurti si dhe me ministren e Jashtme të Kosovës, Donika Gërvalla. Gjithashtu do të ketë një takim kortezie me ish-presidenten Atifete Jahjaga. /Kosovaties/
As Japan's Foreign Minister @Kamikawa_Yoko starts her visit to Kosovo today, I regret that I can't be there due to my visit to the UK.
But just last month, I had the pleasure of meeting her at the Women Leaders Summit in Italy. We had a great discussion about the strong alliance… pic.twitter.com/1qJsuB5LsI
— Vjosa Osmani (@VjosaOsmaniPRKS) July 19, 2024
