Shkruan: Pal ShTUFI
Pse gjithë ky pasion pas heronjve?
– Ndoshta na mungon heroizmi ynë, të cilin duhet ta dëshmojmë gjatë jetës që kemi fat ta jetojmë në familje, në shoqëri, në shkollë, në punë, në kulturë, në krijimtari, në rrugë, në natyrë, në lumë, në det, në mal, në ëndrra, në dashuri etj…
Pse kjo ulërimë pas trimave që vrasin me hir e pahir?
– Sigurisht na mungon trimëria për të krijuar paqe në vend të luftës, konfliktit dhe gjakut. Ndonëse luftës shpesh i mjafton një trim a hero, paqja do shumë më shumë trima.
Pse kemi kaq shumë heronj?
– Ndoshta pikërisht pse brenda tyre ka aq pak, nuk e di.
A është e mundur të kemi hero dhe hajn në të njëjtin njeri?
– Nuk e di për gjetkë, por tek ne Kanuni nuk lejon pyetje kaq putane. Megjithatë po të përgjigjem. Po, shumica e heronjve dhe trimave të atdheut vuajnë nga kjo simbiozë.
Ju e dini që nuk ka pyetje të keqe?
– Pyetja, e cila shkakton një përgjigje që zhvesh heronjtë dhe trimat nga aura e lavdisë, padyshim është pyetje e keqe, por meqë hyra në këtë valle, po e luaj deri në fund.
Po intelektualët, çfarë kanë që vrapojnë pas trimave?
– Edhe ata janë në vrapim-kërkim të trimit të munguar brenda tyre, atij trimit që ndezë dritën në kuzhinën e errët ku zihen gënjeshtrat, të cilat mbajnë gjallë kombin, sot për nesër!
A kemi intelektualë të mirëfilltë?
– Po, por shumica nuk bëhen të gjallë. Kur të kalojnë furtunat, ata dinë shumë mirë të përshkruajnë çdo gjë. Mbase edhe heshtjen e tyre epike.
A besoni në Zot?
– Po. Më ka fascinuar urdhri i të lumit Zot kur i dha të drejtë të fortit që të fitojë gjithmonë mbi të dobëtin.
Por Allahu është mëshirues, na i falë gabimet, apo?
– Po, pa dyshim. Madje edhe intelektuali më i madh i fisit, Milazim Krasniqi ka thënë: “Secili prej nesh duhet ta luftojë e ta mposhtë frikën se gjoja do të na zbulohen të palarat. Allahu ka garantuar se na i mbulon të këqijat, nëse jeni besimtarë të sinqertë” – 28.7.2023.
Dmth, heronjtë tanë të ardhshëm mund të bëjnë krime pa fund, meqë të palarat e tyre nuk do të dalin sy botës?
– Kjo është e garantuar, jo vetëm nga Allahu, por edhe nga Intelektuali që përmenda më parë. Ai i di të gjitha.
Tani ma humbe fijen e lëmshit!
– S’kemi si e humbim fijen kur s’kemi fare lëmsh, ngase lëmshi jemi ne, e fija jonë është në duar të vëllezërve tanë – ish pushtuesve të dashur!
