Chelsea ka nënshkruar me mbrojtësin e majtë amerikan Caleb Wiley i cili vjen nga Atlanta United.
Klubi i Premier League ka njoftuar të hënën se nëntëmbëdhjetë vjeçari ka rënë dakord për një kontratë gjashtëvjeçare me një opsion për një zgjatje të mëtejshme edhe për një sezon.
“Chelsea është i kënaqur të njoftojë nënshkrimin me futbollistin e Shteteve të Bashkuara të amerikës, Caleb Wiley”, ka komunikuar klubi anglez.
Wiley ka qenë pjesë e skuadrës së parë të Atlantas që nga viti 2022, duke bërë debutimin e tij për ekipin e seniorëve të ShBA-së kundër Meksikës në tetorin e kaluar. Aktualisht ai ndodhet në Paris, ku është pjesë e skuadrës amerikane për Lojërat Olimpike.
Kur të arrijë në “Stamford Bridge”, Wiley do të vlerësohet nga trajneri i ri Enzo Maresca si konkurrent i Marc Cucurella dhe Ben Chilwell. Megjithatë, është raportuar se Wiley mund ta kalojë sezonin e ardhshëm në huazim te klubi francez Strasburg, i cili është pjesë e të njëjtit grup pronësor me Chelsea.
