EKZEKUTIVËT e prodhuesit japonez të barnave Kobayashi Pharmaceutical kanë dhënë dorëheqjen, duke marrë përgjegjësinë për kontaminimin e një suplementi dietik që mund të ketë shkaktuar vdekjen e 175 personave, sipas ministrisë së shëndetësisë. Në mars, Kobayashi Pharmaceutical njoftoi se familjet e viktimave kishin raportuar pesë vdekje të lidhura me konsumin e rregullt të suplementit të orizit të fermentuar beni, sipas Japan Times.
Produkti reklamohet si një suplement dietik që ul kolesterolin e lartë dhe presionin e gjakut, por përdoret gjerësisht edhe si ngjyrues për produktet ushqimore. Pas konsumimit, klientët raportuan në kompani simptoma të tilla si ndryshime në ngjyrën e urinës, ënjtje të gjymtyrëve dhe lodhje.
175 vdekje të mundshme
Në fund të qershorit, ministria e shëndetësisë paralajmëroi se numri i vdekjeve potencialisht të lidhura me konsumin ishte dukshëm më i lartë dhe në fillim të korrikut tha se familjet kishin raportuar 175 vdekje ndoshta të lidhura me konsumin e produkteve farmaceutike Kobayashi.
Udhëheqësit dhanë dorëheqjen
Të martën, kompania njoftoi se Shefi Operativ dhe Presidenti Akihiro Kobayashi, dhe CEO dhe Kryetari i Bordit Kazumasa Kobayashi, të dy anëtarë të familjes themeluese, kishin dhënë dorëheqjen. Vendimi u mor “për të sqaruar përgjegjësinë ekzekutive”, tha Kobayashi Pharmaceutical, duke shprehur ngushëllime për familjet e të ndjerit dhe duke kërkuar falje për klientët dhe partnerët.
Kompania konfirmoi se ajo shiste ose furnizonte tableta të bazuara në oriz beni për rreth pesëdhjetë kompani vendase dhe dy kompani në Tajvan. Kompanitë tajvaneze kanë tërhequr 154 produkte me këtë përbërës si masë paraprake, sipas BBC.
